Katla Eldey Þorgrímsdóttir er 7 ára stelpa sem býr í Nesjahverfi. Foreldrar hennar eru Þorgrímur Tjörvi Halldórsson og Birna Jódís Magnúsdóttir sem eiga og reka veitingastaðinn Úps og keramikvinnustofuna Endemi.
Katla fílar vel að búa hér í Hornafirði og æfir fimleika. Sjálf segist hún vera búin að æfa sig í mjög mörg ár að gera arabastökk og handahlaup.
Við spurðum Kötlu hvað draumastarfið hennar væri, “mig langar að vera kokkur í fyrsta lagi, svo langar mig að gera keramik og allskonar bolla, svo langar mig líka að vera dansari og söngvari”, segir Katla.
Kötlu er greinilega umhugað um að við séum öll góð hvort við annað en þegar hún var spurð hvað hún vildi að helst myndi breytast, ef hún hefði völd til að breyta einhverju svaraði hún að hún vildi helst breyta því að fólk væri ekki að vera leggja í einelti, meiða og vera leiðinleg og bætti við að maður gæti líka bætt sig í því sem maður gerir sjálfur.
Nú snúum við okkur að jólunum og spyrjum Kötlu hver sé uppáhalds jólasveinninn hennar og það stendur ekki á svörum og er Stúfur í uppáhaldi hjá henni og segir Katla að “í hvert skipti þegar við vorum að leika jólasveina var ég alltaf valin sem stúfur því ég var svolítið lítil”. Jólin snúast í hennar huga um að eyða tíma með fjölskyldu sinni og þeim sem maður elskar. Við spurðum hana hvað hún vildi helst fá í jólagjöf ef hún gæti valið hvað sem er í heiminum og svaraði Katla: “ég á alveg mjög mikið dót það sem ég myndi óska mér í jólagjöf væri örugglega að fá að… þetta er svolítið erfitt… það væri örugglega að fá að leika í Harry Potter mynd, það er uppáhalds draumurinn minn og jólagjöf og að fá að hitta Emmu Watson, Daniel Raddcliff og Rupert Grint því þau leika Harry, Hermione og Ron” og bætti hún við að Ginny Weasley væri hennar uppáhalds Harry Potter persóna vegna þess að “hún getur verið feimin eins og ég, hún er hugrökk og skemmtileg sögupersóna. Kötlu finnst skemmtilegast að eyða tíma með fjölskyldunni sinni á aðfangadag og þegar hún fékk spjaldtölvu frá mömmu og pabba í jólagjöf. Við spurðum Kötlu út í uppáhalds jólamatinn hennar: “Á ég að segja þér hvað við borðum um jólin, stundum borðum við önd ekki bara venjulega önd, við skerum hana upp, pabbi skar hana upp, með mér og svo tók hann mynd af mér með lappirnar af henni og svo skárum við allt úr henni og settum ávexti inní hana, en mér fannst það ekkert mjög gott. Pabbi minn býr til besta kjötbollu spaghettí í heimi og það er uppáhalds maturinn minn.“
Kötlu finnst hvít jól skemmtilegri en rauð jól því henni finnst svo gaman að gera snjókalla og borða snjó.
Við þökkum Kötlu kærlega fyrir að setjast niður með okkur og svara nokkrum spurningum og óskum við henni og fjölskyldu hennar gleðilegra jóla og farsældar á nýju ári og vonum við að hún muni eiga góðan tíma með fjölskyldu sinni og þeim sem hún elskar.
