Eystrahorn er héraðsmiðill Hornfirðinga og vettvangur fyrir efni úr samfélaginu. Hlutverk blaðsins er að miðla upplýsingum til lesenda með fréttum, fróðleik, viðtölum, aðsendu efni og auglýsingum, ásamt því að varðveita heimildir sem ekki eru alltaf skráðar annars staðar.

Auglýsing

Blaðið hefur bæði upplýsingagildi og menningarlegt gildi fyrir íbúa sveitarfélagsins. Þar er sagt frá mannlífi, viðburðum, verkefnum, félagastarfi, atvinnulífi og öðru sem á erindi við samfélagið í Hornafirði.

Aðsendar greinar eru á ábyrgð höfunda og efni þeirra þarf ekki að endurspegla skoðanir ritstjórnar eða útgefanda Eystrahorns. Ritstjórn leggur áherslu á að Eystrahorn sé opinn, málefnalegur og uppbyggilegur vettvangur. Blaðið er ekki farvegur fyrir persónulegar deilur eða mál sem snúa að því að útkljá ágreining einstaklinga fyrir opnum tjöldum. Það má aftur á móti takast á um málefni og rökræða þau af virðingu og ábyrgð.

Ritstjórn leggur almennt áherslu á nýtt efni eða efni sem hefur ekki þegar birst opinberlega annars staðar. Efni sem áður hefur verið birt getur þó átt erindi í Eystrahorn ef það hefur sérstakt gildi fyrir samfélagið, birtist í nýrri eða breyttri mynd eða á erindi sem hluti af skrásetningu mannlífs, sögu og menningar í sveitarfélaginu.

Vegna takmarkaðs rýmis í prentaðri útgáfu blaðsins getur þurft að velja úr innsendu efni, stytta texta eða færa efni milli tölublaða. Við slíkt val er horft til þess að efnið eigi skýrt erindi við lesendur, tengist Hornafirði eða samfélaginu hér og falli að hlutverki Eystrahorns sem héraðsmiðils.

Guðrún Ásdís Sturlaugsdóttir
4. maí 2026