UNGMENNARÁÐ HORNAFJARÐAR

0
752

Í Sveitarfélaginu Hornafirði er starfandi ungmennaráð sem fundar einu sinni í mánuði í fundarsal ráðhúss. Auk þess eru reglulega vinnufundir hjá ráðinu. Ungmennaráð er fyrir ungt fólk á aldrinum 13 – 24 ára og er það sett saman af 10 fulltrúum á eftirfarandi hátt.
Þrír fulltrúar frá grunnskólanum, þrír frá framhaldskólanum, einn frá UMF Sindra, einn frá Þrykkjunni og tveir frá atvinnulífinu.
Tilgangur ungmennaráðs er tvíþættur.

-Að ungt fólk hafi rödd í samfélaginu og læri hvernig stjórnsýsla sveitarfélagsins starfar.
-Að hlustað sé á skoðanir ungs fólks og virðing borin fyrir þeim í ákvarðanatöku í sveitarfélaginu.
Ungt fólk hefur skoðanir á málefnum samfélagsins og það skiptir máli að það gleymist ekki þegar ákvarðanir eru teknar.


Dæmi um þátttöku ungmennaráðs í ákvörðunum og samtali líðandi stundar er vinna sem nú fer fram um uppbyggingu, þróun og stefnu íþróttamannvirkja í sveitarfélaginu. Ungmennaráð á fulltrúa í starfandi vinnuhópi og tekur virkan þátt í því samtali enda mun væntanlega 70% ungmenna í sveitarfélaginu nýta sér mannvirkin utan skólatíma.
Ungmennaráð hefur rétt á áheyrnarfulltrúa í fastanefndir sveitarfélagsins og hvetur ungmennaráð fastanefndirnar til að vísa málefnum til umsagnar hjá ungmennaráði.
Höfn í Hafnarfirði
Annað viðfangsefni ungmennaráðs er að taka þátt í samstarfsverkefnum sem hafa það að markmiði að byggja upp ungmennaráð og framtíð þeirra um allt land. Með það að leiðarljósi hófu ungmennaráð Hornafjarðar og ungmennaráð Hafnarfjarðar samstarf.
Samstarfsverkefnið gengur undir vinnuheitinu Höfn í Hafnarfirði og fékk það nýlega umtalsverðan styrk frá Evrópusambandinu sem er mikil viðurkenning fyrir vinnu og málstað ungmennaráðanna. Markmið verkefnisins Höfn í Hafnarfirði er að ungmennaráðin endurspegli sig í hvort öðru og að bæta störf ungmennaráða um allt land með spurningunni “Endurspeglar okkar ungmennaráð fjölbreytileika samfélagsins?” Því þó að ungmennráðin hafi oft á tíðum verið öflug og góð, þá hefur kannski skort þangað inn ákveðinn fjölbreytileika. Svo að ungmennaráð spegli raunverulega fjölbreytileika samfélagsins, ættu þá ekki meðal annars að vera þar ungmenni af erlendum uppruna, flóttafólk, hinsegin ungmenni og ungmenni með fötlun svo að raddir allra heyrist? Verkefnið verður að miklu leyti unnið með hjálp samfélagsmiðla og reglulegra rafrænna vinnufunda, en einnig er á döfinni að ungmennaráðin tvö heimsæki hvort annað og læri af hvort öðru og geti saman endurmótað starf ungmennaráða til hins betra.

Emil Morávek