Saman náum við árangri

0
720
Á myndinni eru Jón Áki Bjarnason forseti, Pétur Bragason varaforseti og Sigurjón Örn Arnarsson féhirðir Kiwanisklúbbsins Óss og Jón Garðar Bjarnason aðalvarðstjóri lögreglunnar á Höfn og börn í fyrsta bekk Grunnskóla Hornafjarðar

Kiwanisklúbburinn Ós hefur starfað á Höfn í bráðum 34 ár. Fljótlega var stofnaður styrktarsjóður til að halda utan um ágóða af verkefnum klúbbsins sem fara í styrki. Fyrsta stóra verkefni klúbbsins var að gefa leikskólanum kastala og hefur Ós alltaf stutt leikskólann á Höfn gegnum árin. Nefna má að fyrsti styrkur vegna íþróttagleraugna hefur verið greiddur út en Ungmennafélagið Sindri veitir upplýsingar um það.  
Árlega eru tíu til tuttugu bágstaddar fjölskyldur styrktar í kringum jólin og nýtist hluti af jólatréssölunni í það með aðstoð Nettó. Þá hefur Ós styrkt grunnskólann og framhaldsskólann með veglegum gjöfum. Fé var sent til fátækra barna Rúmeníu vegna skókaupa gegnum Kiwanis Children Fund.  
Heilbrigðisþjónustan hefur fengið sinn hluta af söfnunarfé til tækjakaupa og ýmsar safnanir til hjálpar langveikum börnum hafa fengið sinn skerf. Páskabingóið var ekki haldið þetta starfsár vegna Covid en félagi okkar í Ós, Ásgeir Ásgeirsson hefur aðstoðað okkur með páskaeggin frá Freyju. 
Groddaveislan tókst vel þetta árið þrátt fyrir fjöldatakmarkanir vegna Covid.  Félagar og eftirtalin fyrirtæki; Hafið, Martölvan, Frá haus að hala, Ajtel Iceland, Múrfeðgar, Húsamiðjan, Þingvað og Mikael ehf fá þakkir fyrir aðstoð og þátttöku sína að verkefnum klúbbsins.  
Kiwanis er með landsverkefni á hverju ári en það er hjálmaverkefnið til sex ára barna og var hjálmaafhendingin í ár í Hafnarskóla þann 29. apríl með aðstoð lögreglunnar.   
Þá má að lokum geta þess að það stendur til að stofna öflugan kvennaklúbb hér á Höfn en vegna Covid hefur allt seinkað. Hægt er að vera með með því að senda póst á seinars@kiwanis.is til að vera með frá byrjun.  
Í júní verður fjölskyldudagur Kiwanis­klúbbsins Óss, og verður öllum sem hafa áhuga á að ganga í Kiwanis boðið að taka þar þátt með börnum og barnabörnum. Jón Áki forseti og Stefán Brandur kjörforseti veita áhugasömum upplýsingar.  
Oft erum við spurðir hvað Kiwanis er. Kiwanis er alheimssamtök sjálfboðaliða kvenna og karla sem hafa það að markmiði að bæta heiminn með þjónustu í þágu barna. Saman getu við áorkað því sem einstaklingar geta ekki einir. Þetta gerir okkur kleift að vinna að innlendum og alþjóðlegum verkefnum innan Kiwanishreyfingarinnar.  
Saman vinnum við einnig að umbótum á landsvísu.  Ekki síst er unnið að mannúðar- og framfaramálum sem horfa til heilla fyrir bæjarfélög klúbbfélaga, og því sem opinberir aðilar annað hvort vilja ekki eða geta ekki sinnt.     

Gleðilegt sumar. 
Stjórn Kiwanisklúbbsins Óss