Lokahóf knattspyrnudeildar Sindra

0
11
Verðlaunahafar í kvennaflokki, frá vinstri: Jovana, Guðrún Ása og Arna Ósk

Lokahóf knattspyrnudeildar Sindra fór fram þann 28. september á Hafinu. Hófið heppnaðist einstaklega vel enda var veislustjórinn í essinu sínu, Ólafur nokkur Jónsson, markmannsþjálfari og meistaragrínari hélt uppi fjörinu að þessu sinni. Albert Eymundsson mætti með gítarinn og Kaffi Hornið kom með matinn og var hann mjög góður.
Hápunktur kvöldsins var að sjálfsögðu veiting viðurkenninga og voru fjölmargar veittar að þessu sinni. Kristján Guðnason, fyrrverandi formaður knatt­spyrnudeildarinnar, Linda Hermannsdóttir, fyrrverandi ritari knattspyrnudeildarinnar og Gunnar Ingi Valgeirsson, fyrrverandi stjórnarmaður knattspyrnudeildar fengu blómvendi sem þakklætisvott fyrir vel unnin störf í þágu klúbbsins.
Alls léku 25 leikmenn sinn fyrsta deildarleik fyrir meistaraflokka Sindra á liðnu tímabili og fengu þeir rós að launum.
Viðurkenningar fyrir áfangaleiki hlutu eftirfarandi leikmenn:

50 leikir:
Kristófer Daði Kristjánsson
Róbert Marwin Gunnarsson
Mate Paponja
Þorlákur Helgi Pálmason
Tómas Leó Ásgeirsson
100 leikir
Ingvi Þór Sigurðsson

Markahæstu leikmenn meistaraflokkanna voru þau Alexandra Taberner og Tómas Leó Ásgeirsson. Efnilegustu leikmennirnir eru valdir af þjálfaranum og voru þau Arna Ósk Arnarsdóttir og Sigursteinn Már valin í ár.
Mikilvægustu leikmennirnir eru valdir með atkvæða­greiðslu leikmanna á lokahófinu og var Guðrún Ása Aðalsteinsdóttir fyrir valinu hjá stelpunum með nokkrum yfirburðum og Þorlákur Helgi Pálmason vann kosninguna hjá strákunum með miklum meirihluta atkvæða.
Besti leikmaðurinn er síðan valinn af þjálfaranum og var Jovana Milinkovic valin best hjá stelpunum og Tómas Leó Ásgeirsson hjá strákunum.
Að lokum var Sindramaður ársins valinn af stjórn knatt­spyrnudeildarinnar í fyrsta skiptið. Það er sá leikmaður sem hefur sýnt hvað mesta elju í fjáröflunum og vinnu fyrir félagið, jákvætt hugarfar og almenna prúðmennsku. Fyrir valinu að þessu sinni varð Kjartan Jóhann Einarsson en hann hefur unnið á öllum leikjum sem hann mögulega kemst á hjá bæði karla og kvennaliðinu, talið dósir í gríð og erg, tekið saman bolta og keilur af miklu kappi, skrifað textalýsingar, unnið í sjoppu og verið gríðarlega jákvæður gagnvart þeirri sjálfboðavinnu sem þarf að sinna í svona félagi og var því vel að þessum titli kominn.
Stjórn knattspyrnudeildar Sindra þakkar ykkur, kæra Sindrafólk, fyrir frábært kvöld. Sérstakar þakkir fær að sjálfsögðu veislustjórinn, Ólafur Jónsson, en hann hefur hér með verið æviráðinn í þetta starf.