Barnastarf Menningarmiðstöðvar Hornafjarðar

0
51
Krakkarnir fóru í blíðskaparveðri inn að Þorgeirsstaðarfossi og léku sér í ánni

Hefð er fyrir því að Menningarmiðstöð Horna­fjarðar standi fyrir fræðslu og skemmtiferðum fyrir börn frá sjö ára aldri. Í sumar var þar engin breyting á og voru farnar tíu ferðir, tvær þeirra voru farnar í samstarfi við leikjanámskeið Sindra og gekk það vonum framar og mættu þá um 60 börn í ferðirnar, annars eru vanalega um 15 börn að meðaltali í ferðum miðstöðvarinnar.
Í barnastarfi sumarsins skoðuðum við nærumhverfið og fræddumst um náttúruna, fórum í bátsferð út í Mikley, farið var upp að Þorgeirsstaðafossum og leikið í ánni. Björn G. Arnarson fór með börnin út í Ósland og sagði þeim frá lífríkinu og lífsháttum fugla. Við skoðuðum Þórbergssetur, heimsóttum Jöklaveröld Í Hoffelli og skelltum okkur í pottana góðu. Við heilsuðum upp á dýrin í Flatey og fræddumst um hesta hjá Hlíðarbergshestum. Í ár var einnig boðið upp á listasmiðju í barnastarfinu þar sem börnin skoðuðu það sem finna má úti í náttúrunni í smásjám og unnu svo listaverk í tengslum við það.
Ferðirnar tókust allar mjög vel og við vorum við mjög heppin með veður í sumar. Börnin stóðu sig öll með prýði og hafa greinilegan áhuga á umhverfi sínu.

Kíkt var í Flatey og fengu börnin að skoða kýrnar

Starfsfólk Menningarmið­stöðvarinnar þakkar öllum þeim sem tóku þátt í ferðunum og öllum þeim sem lögðu lið. Svona starf getur ekki gengið nema með velvilja samfélagsins og hans njótum við svo sannarlega
Sérstakar þakkir fá: Fallastakkur ehf., Björn Arnarson, starfsmenn Þór­bergsseturs, Flateyjar, Hlíðarhesta, Jöklaveraldar og hafnarinnar, bílstjórar og leikjanámskeið Sindra.