Skuggakosning fór fram samhliða sveitarstjórnarkosningum í Sveitarfélaginu Hornafirði, kosið var í öllum kjördeildum í sveitarfélaginu. Ungmennaráð sveitarfélagsins stóð fyrir kosningunni líkt og í síðustu forsetakosningum.
Ágæt kosningaþátttaka var meðal unga fólksins eða 53,42% og virðist sem þau kjósi frekar á kjörstað samhliða foreldrum sínum miðað við þátttöku í skuggakosningum framhaldskólanna sem haldnar voru í framhaldsskólum landsins en þar var meðaltals kjörsókn 35,28%. 146 voru á kjörskrá í Sveitarfélaginu Hornafirði á aldrinum 13-17 ára.
Kosningaþátttaka í sveitarstjórnarkosningunum var 78,6% og var um það rætt á kjörstöðum hve margir af ungu kynslóðinni komu til að kjósa sem höfðu aldur til. Talið er að það tengdist því að yngra fólkið tók þátt í skuggakosningum samhliða forsetakosningum árið 2016. Það sýnir að það er líklegt að þátttaka í skuggakosningum geti leitt til frekari kjörsóknar. Við höldum okkur bara við þá útskýringu í bili að minnsta kosti.
Ekki er mikill munur á niðurstöðum skuggakosninganna og sveitarstjórnarkosninganna en þó einhver prósentulega séð. Sama forrit var notað til útreikninga til að fá sömu niðurstöður sbr. röðun fulltrúa eftir atkvæðum ofl.
Ungmennaráð Sveitarfélagsins Hornafjarðar þakkar öllum sem tóku þátt í skuggakosningunni.
